بعطله عيد الاضحى كنا مخططين نسافر بس الله ما كتب لنا وبدال ما اضيع اجازه 9 ايام بمطاعم ونوم وسوق اشتركت مع

Bubbles Diving Center

دورة تدريب غوص لمدة اسبوع

شهادتهم معترف فيها عالميا ومعتمده من منظمه

NAUI

وعشان ناخذ الشهاده والليسن لازم نكمل 4 غوصات

اول يومين من الدورة محاضرات بمركز الصبيح مع المدرب عبدالرحمن العنيزي عن المعدات والاحتياطات والمخاطر الي ممكن تصير وشلون نتجنبها

ثالث يوم تدريب بالمسبح مع المدربه العسل دلال العمر

رابع يوم غوصتين بجزيره قاروه

طبعا ما تقارن غوصة المسبح بغوصة البحر الوضع كان يخرع اكثر من المسبح واكيد ضغط الماي اقوى بس استمتعنا :D

الرؤيه مشالله عجيبه والماي صافي كان ودي اصور تحت الماي بس حسافه كامرتي حدها 3 متر تحت الماي :(

معلومه: يقولكم سموها قاروه لان فيها قار طبيعي يعني تسبحون بنفط كشخه :P

-

خامس يوم غوصتين بجزيره كبر

اول شي عبالي نجمه البحر متحوله بس طلع هالكائن ينقال له كوكيز البحر او دولار البحر :P

واهوا وقنفذ البحر كان في منهم وايد بكبر

ولي هني خلص يومنا بكبر على منظر الغروب

والحمدالله كملت 4 غوصات وشطبنا الغوص من ال

Wish list :D

اليوم السادس عباره عن اخر محاضره واستلام الشهاده والليسن

الحلو لما تخلصون الدوره و تاخذون الليسن تقدرون تطلعون معاهم البحر بالويكند بس للاسف اشتركنا على نهاية موسم الغوص وهذا اخر اسبوع لهم , يردون يبطلون شهر 4 انشالله

اذا ودكم تجربون شي يديد وتكسرون روتين ضروري ضروري تجربون الغوص والله شعور عجيييب ما ينوصف حتى لو ما تعرفون تسبحون عادي اشتركوا وجربوا مافي شي اسمه مستحيل

وللعلم انا ما اعرف اسبح حدي حدي عاليال ولا اغرق بعد :P بس تشجعت وتعلمت والمدربين ماقصروا

المـدربيـن: عبدالرحمن السرهيد, عبدالرحمن العنيزي, فواز خزعل, طلال الزمانان ودلال العمر ….. يعطيكم ألف ألف ألف عافيه تعبتكم معاي ,كلمه شكرا ما توفي بحقكم


Scuba diving experience دورة تدريب غوص سكوبا