صارلي فترة أمشي على نظام رجيم

و اللي هو عباره عن و باختصار شديد : أكل من شركات الرجيم المختلفه و مطاعم الدايت المنتشرة عندنا في منطقة الجابرية ، و لغيت وجبة العشا و أحاول في كل فرصه ألقى نفسي فاضي اروح النادي . و طبعا نسيت شي اسمه بيبسي و مشروبات غازيه و استمريت على العصاير الطبيعية

المهم اللي بوصل له في هالبوست ان اكل الرجيم يقيدك و مرات يخليك تكرر الوجبه اكثر من مره في الاسبوع و هذا الشي يدعو للملل و ممكن يخليك تكسر نظام الرجيم و تغش و تاكل أكل يهدم اللي بنيته كله

و علشان جذي حبيت اشاركم هالمعلومه ، مادري اذا في غيري انتبه لها ولا بس آنا ،، اللي هي ان في وجبات رجيم متنوعه و صحية و رخيصه تتوفر في الجمعيات و مركز سلطان . و هي لشركات مختلفة مثل لو فات و دايت كير و بعض الشركات اللي لأول مره اسمع فيها

و هذي بعض الصور للوجبات اللي صرت اشتري منها كل جم يوم و احطها عندي بالبيت علشان مو كل يوم اطلع و اطق درب و اشتري .. و بجذي صرت محافظ على رجيمي و بنفس الوقت قاعد أنوع بالأكل بدون ملل .. و على فكرة ترى عندهم مجابيس و ستيكات و لزانيا خضار لذيذه و سلطات على كيف كيفك و هم عندهم ورق عنب و حمص و حلو مثل الجلي و الكريم كرميل و شيز كيك

و هذي صور للوجبات

أنصحكم فيها و بقوة .. و بالعافيه مقدما

diet restaurants رجيم من مطاعم الدايت المنتشرة