|
كافيه الثلجي في دبي Chill out cafe in Dubai
كنت أسمع من زمان عن كافيه ديكوره من الثلج و درجة حرارته منخفضة جدا و تجربة زيارته من أكثر التجارب اثارة في دبي حيث تعيش تجربة الحياة في فريزر بارد على هيئة كافيه
كانت الفكرة فكرة صديقي الجديد و اللي تشرفت بلقائه و معرفته خالد الفيلكاوي صاحب مدونة KOR Blog حيث اقترح خالد نلتقي في هذا الكافيه علشان تكون ذكرى اللقاء حلوه و مميزه و بنفس الوقت نعيش تجربة جديدة محد فينا جربها من قبل ، و كان اللقاء و التعارف الطيب بيني و بين خالد و النعم فيه خوش ولد و قعدنا نسولف بالساعات .. طبعا مو داخل الكافيه لأن ما اعتقد قدرنا نطول فيه اكثر من 40 دقيقة .. لكن كملنا قعدتنا في كاريبو كافيه اللي يقع ايضا في داخل المجمع اللي فيه كافيه شيل آوت .. و هو مجمع تايم سكوير
الأجواء وايد حلوه و باردة و القعدة مميزة و لكن تتطلب تحضيرات قبلها أولا لازم تكونين لابسين شي طويل .. يعني مثلا اللي مفكر يروح لابس شورت ما أنصحه لأنهم راح يعطونك جاكيت مع دس و تكرمون جوتي لو حبيت .. لذلك يفضل لبس شي طويل تحت و هذي الجاكيتات مصففه و جاهزه حق الزوار
و أيضا أضافوا في الفترة الأخيرة بعد نجاح فيلم فروزين صور لشخصيات الفيلم اللي تدور أحداثه الحلوه في الثلج .. فلا تستغربون لو شفتي إلسا أو أوليف حواليكم
في كافيه يقدم مشروبات ساخنة و إحنا طلبنا هوت شوكليت من شدة البرد
نسيت أقول لكم إن كان معانا حمد صديق خالد و كان معاي عبدالله ولد أخوي .. و أثنينهم كانو لابسين شورتات و كلوها مساكين .. بس كانت تجربة حلوه و ضحكنا على الموقف أتركم مع صور من الكافيه
Chill out cafe – Time square mall / Dubai
من سياحة وسفر
|
