رحلتي إلى أمريكا

أخبار النوخذة - سياحة وسفر - رحلتي إلى أمريكا

رحلتي إلى أمريكا

السفر لأمريكا حلم الجميع

و بالنسبة لي كان حلم من أحلامي إني أروح لها و أسوي تور بين ولاياتها و أشوف أشهر معالمها و أستمتع في أحلى أماكنها اللي نسمع عنها و نشوفها بالصور

هذي مو أول سفرة لي لأمريكا .. سبق و رحت لها لكن كل رحلة كانت خالية من أي تشويق أو أي ذكرى تسوى .. الرحلة الأولى كانت لولاية أريزونا .. و الثانية لولاية تكساس و بالتحديد منطقة هيوستن

لكن التشويق الحقيقي و الرحلة اللي مستحيل أنساها هي الرحلة هذي .. و اللي بكتب لكم عنها .. و اللي تشمل 4 ولايات

فلوريدا – كاليفورنيا – نيفادا (فيغاس ) – نيويورك

قبل ما ندخل بتفاصيل كل ولاية أحب أقول لكم إن هالموضوع بياخذ أكثر من بوست .. يعني راح أكتب لكم تفاصيل رحلة السفرة كلها على بعضها في أكثر من جزء و راح انزلهم اهني في المدونة

في البداية أحب أعطيكم بعض النصايح السريعة و اللي تتعلق في شخصيتك إنت كشخص مسافر لأمريكا .. و أتمنى تتقبلونها برحابة صدر :

لازم تعرف تتكلم انجليزي شوي .. و تفهم انجليزي شوي .. علشان تمشي أمورك، خاصه في بعض المواقف اللي تتطلب نقاش و أسئلة و أجوبة .. ما أقولك صير فلته .. بس على الأقل تقدر تدبر نفسك لا ييت تتكلم معاهم
****
لما تروح أمريكا لا تتردد أبدا إنك تسأل أي أحد عن أي شي إنت مو عارفه أو محتاج مساعده فيه .. ترا اهما شعب ودود وايد و ما عندهم مشكلة يساعدونك و ما عندهم سوالف النفسية و اعمل نفسك ميت جنه ما شافك ولا اسمعك و يحقرك .. لالالا .. هالسوالف مو موجوده عندهم الا ما ندر .. فلا تتحبط و استمر بالسؤال ليما توصل حق الاجابة اللي تساعدك
****
و علشان يساعدونك حاول تكون دايما مبتسم مو تبوز .. إنت مو قاعد في الكويت .. إنت هناك بين الطبيعه و الجو الحلو و الوجوه السمحه .. لذلك أرجوك ابتسم و خلك ودود معاهم و لا تشوف نفسك عليهم
****

إجراءات قبل السفر

((1 ))

أولا و قبل كل شي تأكد إن جوازك مو منتهي .. أو ما يكون على وشك إن ينتهي .. و إذا محتاج تجديد روح جدده في أي مركز خدمة مواطن قريب عليك .. لا تسافر و تكتشف بنص السفرة إن جوازك انتهى علشان ما تتبهذل و تعال كلم السفارة و لويا ..

(( 2 ))

ثانيا لازم تكون عندك فيزا حق أمريكا و طبعا تطلعها في السفارة الأمريكية في منطقة بيان ، و إذا ما تعرف شلون تقدم على موعد حق السفارة روح أي مكتب من المكاتب اللي يطلعون فيز حق السفر سواء حق أمريكا أو غيرها من الدول و اهما راح يساعدونك بس أنصحك تاخذ معاك جوازك إذا بتروح لهم لأن راح يحتاجون اسمك و بياناتك نفس اللي مكتوبة بالجواز و بمبلغ ما يتجاوز 10 أو 15 دينار و بعد ما ياخذون لك موعد راح يدقون عليك يبلغونك بموعدك و الساعه جم تروح السفارة، و اللي ما يدل محلات تساعده في التقديم على الفيزا انصحكم تروحون مجمع السفريات اللي بالديرة يم مبنى الكويتية

ملاحظة مهمة : ترا مو كل من قدم على الفيزا حق أمريكا وافقوا له عليها .. في ناس وايد ارفضوهم و بدون سبب .. و إنت و حظك عاد .. و أهم نصيحة أعطيكم إياها اذا رحتوا تقدمون على الفيزا إنكم تكونون على طبيعتكم لا ترتبكون و اذا ما فهمتوا شي من الشخص اللي يكلمكم انجليزي تقدرون تسإلونهم اذا عندهم مترجم عربي يساعدكم

(( 3 ))

بعد ما تتأكد من وضع الجواز و تاخذ الفيزا روح سو تأمين صحي .. و لا تقولي سفرتي كلها جم يوم .. لا طال عمرك .. دام إنك مسافر أمريكا يا إما تروح تقعد فيها اسبوعين و أكثر أو لا تروح .. ترا هذي أمريكا مو دبي .

آنا شخصيا ما كنت أعرف شي بالتأمين الصحي ولا حتى أعرف أسامي الشركات اللي يقدمونها في الكويت ولا أدري شنهي أفضلهم .. لكن هذا ما يمنع إني أسأل .. مثل ما قلت لكم قبل شوي بالنصايح .. اسأل ثم اسأل ثم اسأل .. و اللي سأل ما يضيع
لذلك آنا رحت أول مكتب تأمين للسيارات شفته جدامي .. لحظه .. مكتب تأمين سيارات شكو و إنت مسافر ؟ .. آنا أقول لكم .. الله يسلمكم دخلت عندهم و سألتهم : ألاقي عندكم تأمين سفر .. قام الريال بكل بساطة و طلع دفتر لونه أزرق و قالي موجود .. وين تبي تروح؟ قلت له أمريكا .. و قعد يشرحلي عن العروض اللي عندهم .. و عن اسم الشركة .. و انها شركة عالمية و لها مكاتب في كل مكان في العالم .. و اسم الشركة
AIG

http://www.aig.com

و على حظي طلعت شركة ممتازة و الحمدلله إني سويت تأميني عندهم، ليش الحمدلله ؟ .. راح أقول لكم بعدين
المهم .. التأمين كلفني 28 دينار و ممكن يكلف أقل أو أكثر على حسب نوع التأمين اللي تسوونه .. في التأمين السياحي و في الرياضي و في الفضي و الذهبي و البلاتينيوم ، و آنا خذت التأمين الذهبي و يشمل :

علشان تشوف الصورة أوضح سو كليك عليها و تشوفها أكبر

شفتو شلون تأمينهم عجيب ؟؟

(( 4 ))

النقطة الأهم بالموضوع كله .. الفلوس .. أو الميزانية .. السؤال اللي يسإله أي أحد بيروح أمريكا : جم آخذ معاي ؟ أو جم تكلفني ؟
بالنسبة حق الميزانية تعتمد على المدة اللي تبي تقعدها هناك، و كثر ما تطول كثر ما تزيد الميزانية . و هم بعد تعتمد على الاشخاص اللي معاك .. يعني اذا معاك زوجتك و العيال اكيد المصرف بيزيد .. و لا تقول بروح بروحي أو مع ربعي .. بالنسبة حق المتزوجين أنصحهم ياخذون عايلتهم معاهم و راح يستانسون وايد في فلوريدا بالتحديد لأنها عائلية و فيها أحلى الأماكن الترفيهية و راح أقول لكم أكثر عنها و بالتفصيل ..
و إذا تبون سعر تقريبي .. أقدر أقول لكم إن للشخص البالغ يحتاج ما يقارب 1700 إلى 2000 دينار إذا كان بيروح اسبوعين بس فلوريدا و المبلغ فقط شامل السكن و المصاريف بدون سعر التذكرة

(( 5 ))

البطاقات البنكية .. و آه يا البطاقات البنكية .. أنصحكم جدا إنكم تحرصون على هالنقطة قبل ما تسافرون، شنو قصدي بالبطاقات البنكية؟ قصدي الفيزا و الماستر كارد ، أرجوكم لازم تحفظون هالمعلومة علشان ما تتوهقون .. ترا بعض البنوك مثل بيت التمويل و بنك الخليج يقفلون البطاقة إذا تمت عملية دفع أو سحب من خلالها داخل الولايات المتحدة الأمريكية .. و أعتقد إن أغلب البنوك تقوم بهالشي مو بس هالبنكين ، و السبب حسب ما عرفت إن في أمريكا تصير عمليات سرقة وايد لذلك يقفلون البطاقة في أي عملية تقومون فيها بالبطاقة .. إلى أن تقوم انت بالاتصال فيهم و تطلب منهم يفكون القفل عنها، أو إذا ماني غلطان أي عملية تقومون فيها و تتضمن مبلغ كبير هي اللي تؤدي لقفل البطاقة ، لذلك لازم تقومون بالخطوات التالية :
أولا : دق على البنك و بلغهم إنك رايح أمريكا قبل السفر و عطهم التاريخ و اليوم بالضبط علشان من تسافر يشيلون القفل عن البطاقة
ثانيا : و هي النصيحة الأهم في هالموضوع كله .. إنكم ما تعتمدون على بطاقة وحدة فقط .. شلون؟ آنا أقول لكم شلون .. يعني فتحوا لكم أكثر من حساب في الكويت في أكثر من بنك و حطو في كل حساب مبلغ و طلعوا من كل بنك بطاقة فيزا
( و يفضل إنها تكون بطاقة مسبقة الدفع)
أو
Pre Paid card
علشان لو انباقت وحده هناك لا سمح الله إلا الثانية موجودة .. و لو انقفلت وحده الا الثانية شغاله .. و جذي

(( 6 ))

جم آخذ معاي كاش و جم أحط في بطاقات الفيزا ؟
هذا الموضوع يرجع لك .. لكن يفضل إنك تشيل معاك كاش ما يعادل 500 دينار على الأقل .. لزوم بعض المصاريف أول ما توصل مثل التاكسي أو شي تبي تشتريه من المطار أو لا سمح الله أي طارئ يحتاج منك مبلغ كاش .. و باجي مبلغ السفرة مثل ما قلت لك وزعه على أكثر من بطاقة فيزا .. و احرص على فلوسك عدل و حطها في مكان آمن .. و نصيحتي لك تاخذ معاك جنطه كروس
تعلقها على جتفك طول السفرة ولا تتركها و تحط داخلها جوازك و فلوسك و تلفوناتك و كل شي تحتاجه .. و حتى لو اضطريت تدخل الحمام في الطيارة أو أي مكان عام خذها معاك و لا تخليها بأي مكان حتى لو كان معاك أحد ترى ممكن يسهى و تنباق الجنطه عادي تصير ترا

(( 7 ))

أخيرا و ليس آخرا .. الجنطه
إذا إنت ناوي تروح أكثر من ولاية ما أنصحك تاخذ معاك هدوم وايد .. ولا جنطه ثقيله .. خذ جنطه عوده خفيفه و فيها شوية لبس و لوازم ضرورية .. و جنطه صغيرة سحب تدخلها معاك بالطيارة و حط فيها لابتوبك و كامرتك إذا ناوي تاخذهم معاك و أنصحك تاخذهم و لا تعتمد اعتماد كلي على الآيباد أو التلفون بالسفر لأن أحيانا تحتاج إلى لابتوب تنجز فيه بعض المعاملات خاصة مواقع البنوك .. آنا شخصيا أحب استخدم اللابتوب علشان أقدر أدش على حسابي و أنجز المعاملات و أراسل البنك إذا في أي مشكلة لأن المكالمات غاليه و إذا كل شوي بتدق عليهم راح رصيد تلفونك . أما بخصوص الملابس فإذا إنت مسافر أنصحك تشتري من هناك ملابس و تكشخ فيهم بدال ما تاخذ معاك كودة ملابس من الكويت ..

(( 8 ))

أشياء ضرورية في السفر

بلاك كهربا يلاءم نوع فيش الكهربا في أمريكا، علشان تشغل أجهزتك اللي بتييبها معاك لأنك غالبا راح تتوهق هناك، و مع ذلك أطمنك اذا نسيت تاخذ معاك بلاكات كهربا ترا يبيعون في الجمعيات عندهم بلاكات توالم جميع الأجهزة

إحرص إنك تاخذ أدوية معاك و خاصة أدوية الفلونزا و الصداع و للبطن و غيرها من الأمراض الطارئة، ليش ؟ لأن أحيانا من توصل ممكن تستمرض لتغيير الجو عليك .. فما تبي تطلع و تدور لك صيدلية .. على الأقل أدويتك معاك، و أساسا جنطة الأدوية خلها معاك في جنطتك اللي معلقها على جتفك لأنك ممكن تحتاجها في الطيارة من بداية الرحلة بس لا تحط فيها أدوية سوائل لأن ممنوع دخول السوائل في الطيارة إذا مو شاريها من سوق المطار نفسه بعد ما تطوف التفتيش الذاتي في المطار

حجز الرحلة

بالنسبة لي غلطت غلطة كان ممكن أتفاداها .. و هي إني حجزت عن طريق مكتب سفريات .. هذي الغلطة الأولى .. لأني كنت أقدر أحجز عن طريق النت بس مادري ليش الصراحه رحت مكتب سفريات و خبيت عمري ؟؟..
أما الغلطة الثاني هي إني حجزت على طيران اللفتانزا ..

طيران اللفتانزا طيران حلو و نظيف لكن عيبه الكراسي على الدرجه السياحية .. راح تتعبون وايد من كراسيهم اللي تذكرني بكراسي طيران فلاي دبي، و تخيل عاد درب 6 ساعات إلى فرانكفورت و تنزل ترانزيت هناك و بعدين تغير الطيارة و تروح 7 ساعات إلى فلوريدا .. تعب مو طبيعي الصراحه ما يسوى علينا .. لكن يالله تجربه و تعلمنا منها ..

شنو نصيحتي لكم ؟ نصيحتي طال عمركم إنكم تحجزون على وحده من هذي الشركات :

الإماراتية – القطرية – البريطانية – الكويتية

و لو إن الأخيرة ما أفضلها لأني ما أأمن لها الصراحه مع ان في ناس يمدحونها .. لكن تاريخ طيران الكويتية ما يشفع لها ، و ما في مجال مقارنة بينها و بين الباجي .. يكفي إن الباجي مصنفين كخدمة طيران خمس نجوم

المهم مالكم في الطويلة .. التذكرة طلعت علينا للشخص الواحد 360 دينار تقريبا ذهاب و عودة .. و فيها ترانزيت واحد فقط
وهو مثل ما قلت لكم في فرانكفورت .. و للأسف كان الترانزيت 6 ساعات ملل و حواسه في المطار على الفاضي

أما الطيران الداخلي فكان المنقذ هو موقع اكسبيديا
http://www.expedia.com/
الحجز عن طريقة سهل جدا و الأسعار اللي تلقونها وايد معقولة

حجـــــز الفنـــادق