الجزء الثاني من رحلتي إلى أمريكا – الوصول إلى أورلاندو و الفندق

لقراءة الجزء الاول من الرحلة الجزء الثاني (الرابط)

يوم 20 أبريل 2014 كانت طيارتنا الساعه 12 بليل تقريبا

رحنا المطار و خذنا أغراضنا معانا و احنا راهين و مستعدين .. و لكن

و آخ من لكن ..

بعد ما عدينا منطقة الجوازات و وصلنا عند البوابة اكتشفت إني ناسي أهم شي للرحلة .. و مو بس للرحلة .. للحياة كلها .. و هو

كروت البنك

أي نعم نسيت كروت البنك كلهم في البيت .. و ما باقي الا 40 دقيقة و نركب الطيارة .. انزين شلون ؟ اطلع ارجع البيت؟ بس ما عندنا سيارة .. اللي وصلونا المطار راحو .. زين و الحل ؟

فكرت منو صاحي هالحزة من ربعي خاصه ان الساعه توها 11 و نص تقريبا ،، قمت و اتصلت على اكثر من شخص ما يردون .. قلت لا هالليله ما راح تعدي على خير و راح تخترب السفره دام هذي أولها

لكن الله ستر و الحمدلله حصلت واحد من أعز الأصدقاء و أأمنهم .. أخوي فيصل الغريب صاحب موقع كوول كويتي
www.coolq8y.com

.. دقيت عليه و فهمته الموضوع و مسكين طار راح بيتنا بسرعه و كانت الوالده في انتظاره و عطته الكروت و يابهم لي المطار بأقصى سرعه .. مشكور فيصل ما تقصر .. و على فكرة ترا صوغتك للحين ماخذتها .. الله يهداك كله مشغول ..

و هذي الحادثة حبيت اذكرها لكم علشان اذكركم شكثر الواحد ممكن يكون مستعد للسفر و يجهز كل شي لكن ينسى أهم شي .. فخلكم حذرين

المهم .. ركبنا الطيارة و مثل ما قلت لكم انصدمت بالكراسي اللي ما كانت مريحة أبدا ..
طرنا إلى مطار فرانكفورت و كانت الرحلة تقريبا 5 ساعات اذا ماني غلطان نمنا فيها شوي و طالعنا افلام شوي و اكلنا شوي .. و قزرت

وصلنا مطار فرانكفورت .. و كنا حيل تعابه و من شدة التعب نمنا على الكراسي مالت البوابه .. و مو بس احنا بروحنا أغلب اللي مسافرين ترانزيت مثلنا نامو و كان الوضع جدا طبيعي حق اللي يشتغلون بالمطار .. أتوقع لو مسمينه مطار النوم وايد أحسن ..

ما علينا .. النومه ما كانت طويلة .. و الكراسي تعور الظهر .. و فجأة قمت من النوم و آنا ميت من الضحك و قلت حق صاحبي كسرت خاطر نفسي .. لو حاجزين على رحلة دايركت .. أو رايحين لندن نازلين ليلتين و بعدين نكمل الى امريكا وايد احسن ..

مطار فرانكفورت زوين .. فيه سوق و مطاعم .. بس تحسون بملل شوي خاصه اذا كان الترانزيت مدته 6 ساعات .. شالله حادنا ؟ ليش يايبين الشقا حق عمرنا ؟؟

يالله هذا اللي صار و الواحد يتعلم .. فأتمنى انكم ما تطيحون في نفس غلطتنا و ابتعدوا عن الترانزيت و خاصه اللي يزيد عن ساعتين ..

طافت الست ساعات و ركبنا الطيارة أخيرا .. و طبعا الدرب من فرانكفورت إلى اورلاندو فلوريدا كان 10 ساعات .. أي نعم 10 ساعات .. الكراسي متعبه .. زحمه في الطيارة .. و أبشركم بعد .. بلشت الفلونزا معاي و آنا بالطيارة

أدري بتقولون شنو هالسفرة اللي من أولها مصايب ؟؟.. لا تستعيلون .. اقرو باجي البوست و البوستات اليايه و بتعرفون احداث و مفاجئات أكثر ..

و آنا في الطيارة بلشت بلاعيمي تعورني .. و صداع .. و جسمي كله بدا ينمل .. و حسيت حرارتي ارتفعت .. و طبعا اهني فايدة جنطة الادوية اللي حرصت عليكم اتييبونها معاكم ..

بلشت أخذ ادوية و آنا في الطيارة .. و نمت شوي .. لكن بصراحه كانت السفرة عذاب من النوع الفاخر جدا .. عذاب مرتب .. عذاب ما أتمناه لأحد أبدا

و أخيرا وصلنا مطار اورلاندو ..

هذا منظر المطار لما تنزل الطيارة .. ما عليكم من الطياره اللي بالصورة طيارتنا أكبر

طبعا المطار صدمني .. حسيت إني في مطار دولة من دول العالم الثالث مو امريكا .. و للأمانه يمكن مطاراتنا أحلى .. مطارهم وايد عادي .. نعم عسى ما شر زوليه و نخل و كراسي داثره ؟؟ .. عموما ما ألومهم لأنه اورلاندو كلها على بعضها تحسها جنك راجع بالزمن إلى الثمانينات .. و اللي شايفين مسلسل
Golden Girls

راح تحسون انكم فعلا تعيشون في هالحقبه لما تدشون مطارهم و تدخلون ديرتهم ..

في المطار راح تروحون قسم الجوازات .. اذا انتو اكثر من واحد راح ينادون كل شخص بروحه .. لا تروحون كلكم مع بعض عند موظف الجوازات .. انتو مو في الكويت حبايبي .. شوي شوي .. على هونكم .. اوقفوا بالدور و روحو واحد واحد و راح يسألكم موظف الجوازات جم سؤال : ليش ياي ؟ شنو سبب الزيارة ؟ جم يايب معاك فلوس ؟ هذي اول مره اتيي ولا ياي من قبل؟ شنو تشتغل في الكويت ؟ و يعني هالنوعيه من الاسئلة .. و اذا حسيت انك متوهق ترا في موظفين عرب بالمطار ينادونهم و يترجمون لك .. و مثل ما قلت لك .. لا تيأس .. اسأل .. دايما اسأل اذا ما فهمت شي او ما عرفت تتصرف

بعد ما تطوف الجوازات تروح تاخذ جناطك .. و بعد ما تاخذهم توقف يفتشون الجناط ع السريع .. و بعدين تطلع

و اهني اتمنى تركزون معاي شوي .. لما تطلعون لا تاخذون تاكسي عادي .. في دور توقفون فيه هذا الدور حق شركة رسمية للتكاسي .. راح تلاحظون اكثر السواق من كينيا و نيجيريا و دول جنوب افريقيا .. طبعا هذيله عيايره و يمكن يحاولون يقصون عليكم مثل ما صار معانا ..

رحنا وقفنا بالدور و صعدنا التاكسي و هو عبارة عن فان .. و عطيناه عنوان الفندق اللي حجزناه عن طريق موقع
booking.com

صاحبنا السايق من البداية حسيته يستهبل .. و طبعا قام يسألنا انتو من وين و اول مره اتيون ولا لأ ؟ و يايين حق منو ؟

و صاحبي ما يعرف انجليزي وايد .. لكن آنا الله وكيلكم رغم التعب و رغم العذاب اللي شفته بالطيارة ما سكت له .. و مع ان صوتي رايح لكن على منو يا حبيبي ؟؟

جان أجابله : إحنا من الكويت .. و يايين اهني من قبل .. و كل سنه انيي امريكا مرتين ثلاث .. و يايين حق ربعنا يدرسون اهني و اهما الحين ناطرينا بالفندق ..

طبعا جذب جذب جذب .. لكن جذب ابيض ما يضر .. بالعكس ينفع .. لأن هالاشكال ما تدري شنو نيتهم .. و يمكن اذا عطيته انطباع انك ياي لأول مره فلوريدا و ما تدل شي و مسكين و على نياتك يبوقك .. و فعلا .. رغم إني غثيته بالجذب و صواريخ تطلع من درايش السيارة و احنا بالطريج .. الا انه النذل حاول يبوقنا .. شلون ؟

قبل لا اقول لكم شلون .. خل اقول لكم ان بالطريج و احنا رايحين الفندق شفنا اورلاندو و شوارعها الحلوه و شفنا هالخضره و الطبيعه الحلوه و الجو كان مو حار وايد لأن وصلنا المغربيات و طبعا لوحات ديزتي و يونيفرسال بكل مكان وتشوق و تحس ودك تروح لهم اليوم قبل باجر

المهم خل اكمل لكم سالفة صاحبنا السايق
وصلنا المنطقه اللي فيها الفندق .. و قعد يحوس و يحوس .. و حسيته يستهبل .. شلون حسيته يستهبل ؟ لأن لما حجزت في موقع بوكنج قريت معلومه جدا مهمه تقول : إن هالمنطقه حيويه و قريبه على ديزني و يونيفرسال و كل الفنادق فيها و عليها اقبال كبير من السياح .. يعني معقوله يا حضرة السايق المحترم ما تدل هالمنطقه و اول مره اتييها ؟ ما اعتقد .. و ما تمشي علينا هالحركات يا العله ..

المهم لما وصلنا الفندق اخيرا و سوينا جيك ان و نزلنا .. و الاخ المحترم نزل الجناط معانا .. قام و صكنا بسعر غير عن السعر اللي قالوا لنا عنه عنده المطار لما وقفنا في الدور حق التاكسي ..

نعم ؟؟ ليش ؟؟ من اولها نصب و افلام ؟ لا حبيبي .. لا تقولي .. كويتي ما ينقص علي .. الحين أوريكم فيه ..

أول شي سويته طال عمركم طلعت تلفوني جان اصور اسم الشركة مالت التاكسي و رقمهم و رقم السيارة اللي محطوط في ستيكر على جنب السيارة .. طبعا اهو اخترع و ارتبك .. جان اقول له ماني معطيك فلوسك .. و اذا تبي روح اشتكي علينا .. و آنا صورت اسم الشركة و رقمكم و بدق عليهم الحين و بقول لهم انك بتاخذ فلوس زياده علينا .. جان يقعد يصارخ و يقول لا انا حست فيكم وايد و فندقكم مخشوش ما يبين و راح وقتي و راح البانزين و من هالخرابيط .. المهم الزبده من التعب زدت شويه على المبلغ المتفق عليه و قطيت الفلوس في ويهه و صعدنا إلى غرفتنا الجميلة .. يعني باختصار اهو باقني الا شوي ..

بعد هالفيلم كله .. أحب الحين أعرفكم على فندقنا في فلوريدا – أورلاندو

اسم فندفنا
بارفوت
Bare Foot Suites
http://www.thebarefootsuites.com/

الفندق عبارة عن شقق فندقية حلوه و نظيفه و يصنف من فنادق الثلاث نجوم

يحتوي أيضا على فلل صغيرة للأجار و اللي يشتغلون فيه في الرسبشن سمحين و تعاملهم حلو و الفندق فيه مسبح حلو حق الكبار و الياهال و الخضرة و المنظر الحلو من البلكونة يالله من فضلك يشرح الصدر

دخلنا الشقة و فعلا مثل ما شفت صورها في موقع بوكنج لما حجزنا كانت فعلا شرحة و حلوه و الغرف نظيفة و السرير في كل غرفة كنج سايز يعني لشخصين .. و هذي صور الشقة اللي كانت في الدور السادس و تطل على منظر روعه

عنوان الفندق

$ 1,497.30 السعر الاجمالي لحجز 10 ليالي بالدولار

يعني تقريبا 430 دينار كويتي
يعني بالليله 43 دينار
و الاجار مقسم على شخصين .. يعني الشخص يدفع بالليله 21 دينار و نص .. أتوقع السعر جدا مناسب

طبعا من التعب ما حسينا بنفسنا قطينا عمرنا و نمنا .. تصدقون ما أذكر جنه طلبنا بيتزا و أكلنا اذا ماني غلطان .. الله
وكيلكم من التعب و المرض كلش ما اتذكر اول ليلة شصار

المهم كل واحد دش غرفته و نام ، و قعدنا الصبح و آنا أحس إني صرت أحسن شوي .. بس رفيجي قالي إنه دش علي الغرفة بالليل و آنا نايم و حط ايده على راسي ولا الحراره الله لا يوريكم و كان متردد يدق على الرسبشن يطلبون لنا الاسعاف ولا ما يدق ؟.. بس تعوذ من ابليس و رجع غرفته و نام

و لما قعدنا لبسنا و طلعنا و رحنا نكتشف المنطقه حوالين فندقنا .. و من اهني بدت المغامرة ..

التكملة في البوست القادم