امس كنت مدعوه في دين اند ديلوكا لتذوق بعض الاطباق من المنيو الجديد
Taste of Kuwait
اطباق تقليديه كويتيه لكن بطريقة مبتكره واضافات خاصه من الشيف لكن مع الاحتفاظ بالنكهة الكويتيه الاصيله

المنيو اليديد راح ينزل بنص شهر سبتمبر القادم ان شاء الله

تكلم الشيف وسيم من دين اند ديلوكا عن الاطباق ومحتواها وخذا ملاحظاتنا عنها

اول طبق قدموه لنا كان القبوط لكن قبوط دين اند ديلوكا ماراح يكون العجينه اللي احنا نعرفها راح يكون عجينة الرافيولي
الطبق وايد لذيذ والعجينه اخف

اللحمه كانت واااايد ترفه ولذيذه مع اني كلش مو من محبي اللحم بالطريقة الكويتيه يعني ما افضل مجبوس اللحم ومرق اللحم وجذي
احب اللحم بدون عظام وبدون شحم ولا شي
بس هاللحمه تبارك الرحمن طيبه

مرق لحم مع البطاط وايد كان لذيذ وفيه لسعة حموضه حلوه بس ناقصه عيش مشخول

وصلنا حق هالطبق البحري
مادري شقول لكم خليط بين المطبق والمربين لأنه من مكوناته الربيان والسمج والمحار بعد
بس خنين ماحسيت فيه زفرة بحر

هالطبق كان احد الاطباق المفضله عندي يعني اذا نزلوا المنيو ان شاء الله اول شي اطلبه راح يكون هذا
تاكو بحمسة الربيان
شي لذيذذذذ وايد حبيته

اغلب الاطباق ينزل معاها المعبوج وهو نوع من انواع المشهيات بالكويت ومكوناته الاساسيه الفلفل
والطبق ينزل معاه عدة صلصات اضافه للمعبوج منها الساور كريم والهلابينو والجبن

مچبوس الدياي
كان لذيذ والديايه ترفه وخنينه وتحسونها مو ناشفه وايد طيبه
ومزينين العيش بالزرشك اللي احبه جدا

وآخر طبق كان مرق باميه مع عيش بطاط
المرق كان لذيذ والباميه طيبه بس يابسه شوي وقلتلهم عن هالشي
اما العيش فحبيته البطاط ذايب ومخلوط مع الزرشك والزعفران وقطع البصل على الواجهه

شكرا دين اند ديلوكا والاخت ميس الانصاري على الدعوه وبانتظار نزول المنيو


المنيو الجديد من دين اند ديلوكا