My Trip to France – Paris – Arrival day رحلتي الى فرنسا – باريس – يوم الوصول

من زمان عن تقارير السفر
انا صايره اذا شفت صور وايد اصير كسلانه جدا جدا
خصوصا انه متابعين الانستغرام كانوا يشوفو معاي بعض الصور اول بأول

ادري فيه ناس وايد ينطرون هالتقرير لأنه شوي ادق بتفاصيل السفره
بس علشان اكون صريحه هالسفرة كانت تـســـــوق في تســـــوق ههههه
يعني الرياييل ماعتقد بيستفيدون شي من هالبوستات بإستثناء الفنادق وجم مطعم رحنا لهم

المهم السفره كانت نص شهر نوفمبر يعني وقت التزيين حق كرسمس والجو بارد لكن جميل
الحمدلله توفقنا وايد بهالوقت

السفره كانت على الكويتيه والله بالروحه الطياره كانت زينه وراهيه بس تعبنا شوي لأنه في ترانزين روما وصارت الرحله ٨ ساعات ونص تقريبا

وصلنا مطار شارل ديغول في باريس
عجبتني الدعاية لجناط دلسي

السكن كان في فندق بالزاك في الشانزلزيه وقريب جدا من قوس النصر
الحجز تم عن طريق موقع بوكينج

الفندق ٥ نجوم مرتب وخدمتهم وايد زينه
بالنسبه للاسعار ماراح احطها اول شي لانه الدفع كان لكل الغرف وبصراحه ناسيه بالضبط جم وثانيا لانه الاسعار من موسم لي موسم تختلف فماراح يفيدكم بشي والموقع اذا دشيتوا يعطيكم الاسعار والعروض الموجوده

الغرف حلوه ونظيفه بس واااايد صغيره

بعد ماارتحنا شوي وبدلنا نزلنا نتمشى في الشانز
واول شي مريناه قوس النصر

بوتيك لوي فيتون في الشانز

دخلنا محل ديزني

كولكشن يديد في ماك

محل حلاو يشوق

بعد التمشي قررنا نتعشى في مطعم
Pizza Pino

حاطين المنيو عند الباب علشان اللي اول مره يدش يعرف نوعية الاكل اللي يقدمونها

كان وايد زحمه لكن اشوه لقولنا طاوله بزاويه على فيو حلو

طلبنا كان
سلطة كابريزي

باستا مع الوايت صوص والمشروم

بيتزا مارغريتا وزدنا عليها زيتون ومشروم وبيتزا خضرا

الحمدلله كان الاكل كله لذيذ وعقبه تمشينا لي فندقنا وحطينا راسنا ونمنا
وان شاء الله باجر احاول انزل لكم بوست اليوم الاول في باريس

تقرير: رحلتي الى فرنسا "باريس"