مواطن عنده بنتلي و مرسيديس s500 وياخذ التموين!

فهد الأربش:

‏آنا أول الاشخاص ((الغير مستحقين)) للتموين

‏المواطنين اللي الله رازقهم وعندهم مدخول وشركات ليش الدولة تعطيهم مواد تموينيه مدعومه؟

‏ذاك اليوم رايح الجمعية مريت على فرع التموين بطريقي لمحل النظارات، سيارتين واقفين عند التموين بنتلي و مرسيديس s500 سواقهم واقفين ياخذون التموين من صباح الله خير باول يوم من الشهر.
‏والمشكلة اغلب الناس اللي الله رازقهم عندهم خدم وحشم اكثر من عدد افراد عائلتهم. يعني البيت فيه 6-8 عاملات واهم 5 اشخاص، يعني الدولة تصرف على العاملات والسواق اكثر من المواطنين؟.

‏الدعوم لازم تروح حق اللي يستحقونها والناس اللي فعلا تحتاجها.

‏ شلون نقارن شخص متزوج ببداية حياته ساكن بشقه ايجار ومعاشه 1000 دك ونص الشهر مفلس مع شخص ساكن بقصر و عندهم مدخول بالسنة 8 ملايين! وعنده ودائع بالبنوك نص مليار دك كاش!؟

‏الغربلة خل تصير كذلك على اصحاب الدخل العالي. وبالمقابل يزيدون الدعوم لاصحاب الدخل المحدود.

‏ادري الكلام راح يزعل البعض بس كلام الحق ما ينزعل منه وهذي اهي العداله.